ආදරබර පියාණනි...

වැදූ මවට දෙවෙනි නොවන
ලෙස ඔබ මා හැදුවා
ඔවා දහම් දී අප වෙත
යහමගටම ගත්තා
මවා දෙන්න සුරපුරයක්
මහ වෑයම් දැරුවා
අවැසි වෙන්නෙ අපගෙ සතුට
නොකියා ඔබ කීවා
ඔබේ සැපත සතුට  අප
වෙනුවෙන් කැප කෙරුවා
දුටුවෝතින් අපෙ හසරැල්
ඔබගෙ දෑස දිලුණා
උපන්දිනේ පතමි ඔබට
දිවිමග දිගු වේවා
නීරෝගී සැපත සතුට
සපිරේවා දිවිය පුරා...

මිරිගුව...

පෙනෙන

නොපෙනෙන මානේ

තිබේ යයි පෙනෙන

සොයා ගියත්

හමු නොවන

සත්‍ය ලෙසම නොවූ

දෙයක් වේද

වටහා ගත නොහැකි

ඇයත් මිරිගුවකි

කිසිදා හමු නොවන...

හිමි නැති සද...

සදට අහස හැමදාම හිටියත්

සද අහසට පාළුව මැකුවත්

තරු පොකුර තුරුලේම සිටියත්

අහසට සද හැමදාම හිමි නෑ...

මලක් පිපුමට ගසක් තිබුනත්

එමලෙ බර ගස දරා සිටියත්

සුවද විහිදා තනිය මැකුවත්

ගසට මල හැමදාම හිමි නෑ...

රුදුරු රළ පෙළ වෙරළ සිම්බත්

පෙණ නගා අසිරියක් මැව්වත්

ඉකි ගසා විත් සෙනෙහෙ කෙරුවත්

රළට වෙරළ හැමදාම හිමි නෑ...

අවසන් ගමන...

ඔබව තනිකර

යා යුතුම විට

යන්න අවසර

දෙන්න හිතවත

නොසිතු මොහොතක

කිසිත් නොකියම

ආයෙ නො එනා

ඒ ගමන වෙත

ලදින් ඇරයුම

යන්න මත්තෙන්

පතමි ඔබ වෙත

සතුට පිරි දීඝායු...

අම්මා...

හැල්මේ දුවන හිත

මට දැන් පාලුයි අම්මේ...

කුරිරුයි සමාජය

ඔබ වගෙ නෑ අම්මේ...

වැටුනොත් පාගා දමනු මිස

අත දීමක් නෑ අම්මේ...

වෙහෙසයි මට ගෙදර එන්න

පාර කියන් අම්මේ...